幾多歲嘅人會讚好100毛？我用數據答你（好似係）

#多謝Shell

自從一月十一日毛記電視第一屆十大勁曲金曲分獎典禮之後，相信依個hashtag，以及活動製作單位100毛已經係無人不知曉。

好似係。

我有教書朋友，興致勃勃咁同啲學生分享自己當晚有幾感動，卻駭然發然原來唔少中學生，根本唔知發生咩事。由此喺臉書上面引發咗一個有關世代、代溝，甚至到香港未來悲觀與否諸如此類嘅討論。

可能你對嗰啲問題更有興趣，但對我嚟講，我哋首先需要解決嘅係基本事實問題：

1. 幾多歲嘅人會睇100毛？
2. 中學生睇唔睇100毛？

當然，如果你係贊助成100萬嘅Shell，或者比100毛兜售過嘅潛在贊助商，絕有可能得悉佢嘅reader demographics。根據信報嘅資料，「毛記電視」網站約75%訪客係34歲或以下，但始終未夠仔細。

如果你係一個單純好奇心重嘅online marketer，或者廣大市民，點先可以知道依啲數據呢？

唔使用Hack嘅，用Facebook就得啦。

用Facebook Adverts Manager 估算

其實只要你係Facebook 用家，而且係一個專頁管理員，你就可以利用佢嘅Adverts Manager去估算佢嘅閱讀年齡層*（記得留意註）。

Facebook Adverts Manager 介面

Facebook Adverts Manager係臉書賣廣告嘅控制台。當你準備落一個廣告嘅時候，你可以定義個廣告嘅接收範圍，而臉書會俾返個範圍估算（potential reach）你知。

有趣嘅地方，就係個選擇範圍入面，係包括廣告受眾嘅興趣，而100毛正正係列入為一種「額外興趣」（課外活動咁解？）。

只要我哋揀定有興趣100most 嘅觀眾，再將年齡範圍按年收窄，我哋就可以得出讚好100毛嘅年齡分佈。而再比較Facebook使用者嘅年齡分佈（用返同一個方法），我哋就可以得出100毛喺不同年齡層嘅受歡迎程度。

‍

數據分析

小弟將Facebook提供嘅數據，整咗個圖表：

• 從比例上睇，100毛最受歡迎嘅年齡係大專生年齡層，十八廿二，有成18%。
• 中學生（13-17歲）嘅受歡迎程度（13.31%），就略低於職場新鮮人（15.12%）。而隨住年齡增長，會like 100毛嘅比例就急劇下降。
• 但若果從人口數目去睇，我哋會發現，其實職場新鮮人先係最大班嘅100毛擁躉，有成12萬幾，遙遙拋離得3萬唔夠嘅中學生組別。

由以上數據我哋可以解釋到，點解我嘅中學教師朋友，會覺得100毛現象係咁犀利，但係問返班中學生就完全唔覺。而且，我哋亦都可以從此年齡組別，略略估計到100毛嘅讀者嘅消費力，肯肯定係好過讀緊書嘅大學生（雖然可能都係廢青）。

分析完數據，完未？未完……

等我戴返個頭盔先

其實以上嘅數據嘅品質頗為粗梳，有唔少前設同埋已知嘅問題：

1. 數據寫明唔係確實like 100毛嘅數目，而係like 100毛同相關嘅專頁嘅人士。而且，Facebook提供嘅只係個約數。
2. 再退後一步，心水清嘅人就會發現如果比較返香港人口普查嘅話，會發現個香港Fb用戶個數目係通漲咗好多。咁係因為一來Facebook的確有唔少假account，而Facebook Ad Manager只係提供「在地」嘅香港用戶，而唔係「真。香港人」（不過其實點先叫真，我到而家都望唔透）。
3. 再退退後一步，依個數據只係講緊Facebook嘅用戶，並無講到其他平台嘅用戶，包括：紙張雜誌、Instagram、網站同毛記電視嘅native app，所以一定有所偏差。我哋起碼要了解，Fb已經係中佬如我嘅玩意，而家啲後生都係玩IG同Snapchat㗎喇。

所以，依個數據充其量只係一個參考，未可作準。

總結

其實講一大論嘢，都係拋磚引玉，希望刺激下討論啫。

好多時我哋討論一個問題嘅時候，往往從意識形態、大道理層面去傾，但係好少去真係落手落腳去搵啲證據比較下。而證據嘅嘢，有時遠在天邊，近在眼前。做人，都係empirical好啲。

至於作為行銷人（marketer），好容易沉醉於諗食字諗爆諗viral嘅「質性」層面嘅嘢，但相對少一種對數據警惕甚至沉溺（obsessed）嘅態度（係，係食咗字）。由其喺講求大數據嘅今日，就算你嘅角色唔係technical或者analytical，都應該培養多啲依兩種能力。Adobe Marketing Cloud最近嘅廣告就講得啱：

Without data, marketing is just a gamble.

以上。

歡迎留言講兩句。

‍